Yjet që i duan kafshët

Ditë më parë në Manchester të Britanisë së Madhe ndodhi një ngjarje shumë e hidhur. Për arsye ende të panjohura, një strehimore e qenve mori flakë dhe me vete mori edhe rreth 50 qenë të ngujuar brenda, ndërsa është arrestuar një 15 vjeçar që dyshohet të ketë qenë personi që i ka vënë flakën strehimores.

Pas kësaj tragjedie, shumë persona u mobilizuan për të mbledhur fonde për rindërtimin e një strehimoreje të re. Në mesin e tyre, pati edhe persona të famshëm që dhanë shuma të majme parash.

Ndër ta ishte edhe sulmuesi i ri i Liverpoolit, Mario Balotelli, i cili besohet se ka dhuruar mbi 10 mijë dollarë, dhe, sipas informatave që qarkullojnë në internet, kjo nuk është hera e parë që Balotelli dhuron para për kafshë – pasi që njihet si një adhurues i madh i tyre.

Por, ka edhe të tjerë të famshëm që i duan kafshët dhe dashurinë ndaj “anëtarëve” të vegjël të familjeve të tyre e ndajnë me gjithë botën përmes rrjeteve sociale.