Në botë ekzistojnë shumë ura, që janë të larta, të gjata, të frikshme… e mbi të gjitha të bukura. Dhe, kur jemi të bukuria, duhet thënë se urat prej guri janë të pakrahasueshme. Andaj, në vijim ju sjellim disa prej urave më të mahnitshme prej guri që i ka ndëruar dora e njeriut…
Spanjë: Ura Puente Nuevo
Ura Puente Nuevo është ndërtuar mes viteve 1751-1793. Me këtë urë lidhen shumë tragjedi. Thuhet se 50 punëtorë kishin humbur jetën gjatë ndërtimit të saj, ndërsa një pjesë e kësaj ure kishte shërbyer si burg, apo dhe si vend ku ishin torturuar njerëzit. Sidoqoftë, kjo urë është shembull i bukur i arkitekturës dhe një pikë e preferuar turistike.
Gjermani: Ura Bastei
Ura Bastei ndodhet në Parkun Kombëtar Sakson. Ajo është ndërtuar nga guri në vitin 1851, për të zëvëndësuar një urë prej druri që ishte ndërtuar në po atë vend, në vitin 1824. Kjo urë ndodhet 305 metra mbi nivelin e detit, ndërsa që 200 vjet është dhe atraksion i madh turistik.
Iran: Ura Khaju Bridge
Ura Khaju, e njohur edhe si Ura Khajoo, është një shembull i përkryer i arkitekturës. Kjo urë është padyshim, ura më e mahnitshme në Iran. Ajo është ndërtuar nga mbreti i Persisë, Shah Abbas II, jo vetëm për të lidhur dy brigje, por edhe për të shërbyer si pendë, apo dhe si vend për takime publike.
Itali: Ura Ponte Vecchio
Ura Ponte Vecchio është ura më e vjetër që përshkruan stilin mesjetar. Kjo urë harkore, është e vetmja e tillë në Itali, që ka mbijetuar Lufta II Botërore. Mbi këtë urë ndodhen një mori dyqanesh, ku mund të blihen suvenire të ndryshme.
Itali: Ura Rialto
Ura Rialto është njëra prej urave më të vjetra mbi Kanalin e Madh në Venecie. Ajo është ndërtuar mbi dy qarqe, San Polo dhe San Marco. Ura Rialto për herë të parë ishte ndërtuar në vitin 1181 nga Nicolo Barattieri, për t’u zëvëndësuar më pastaj nga ura e drurit, në vitin 1255. Sot, ndërkaq, ura është prej guri dhe një prej atraksioneve më të mëdha turistike në Itali.
Spanjë: Ura Puente De Piedra
Ura Puente De Piedra njihet dhe me emrin Ura e Luanit, për shkak të katër kokave të luanëve që ndodhen mbi shtyllat e saj. Kjo urë ishte shkatërruar gjatë vërshimeve në vitin 1643, ndërsa ishte rindërtuar në vitin 1659. Atëbotë, arkitekti Felipe De Busignac, e kishte bërë zgjerimin e urës, duke i shkatërruar dy kullat e saj. Zgjerimi i urës ndërkaq, ishte ndikuar në zhvillimin ekonomik të qytetit.
Greqi: Ura e Konicës
Ura e Konicës, në Greqi, është urë e veçantë, e ndërtuar në vitin 1871. Lartësia e saj është 20 metra dhe mendohet të jetë ndërtuar nga zanatçinj shqiptarë. Ura e sotme e Konicës është urë prej guri, e ndërtuar për herë të dytë, pas një përpjekjeje të dështuar.
Bosnje: Ura e vjetër
Ura e vjetër në Mostar të Bosnjës dhe Hercegovinës, është urë e rindërtuar e Periudhës Osmane. Ura e vjetër kishte mbijetuar 427 vjet për t’u shkatërruar më pastaj, në vitin 1993, gjatë luftës në BeH. Sot, kjo urë është rindërtuar dhe është një prej atraksioneve kryesore turistike në këtë vend. /NGJYRA.COM/
